Sooq Crossfit?

foto-vagn-hansen-lasse-nymand

Crossfit oqimaatsunik kivitseqattaarnerinnaananilu nukittorsarnerinnaanngilaq. Peqqinnartumik timi aalatinneqartarpoq, ataqatigiittoqartarluni kiisalu inuttut inerisaataasarluni, taamatut  Lasse Nymand Petersen isumqarpoq.

Lasse Nymand Petersen, 38nik ukiulik, Crossfitimik sungiusaasutut ilinniarnikuuvoq, Crossfiternerlu ilinniartitsissutigisarlugu. Crossfit amerlasoorpassuit tusaraangamikku, nukittoorsuit, nukittorsaatinik oqimaatsunik assakaasullu qalequtaannik kumminik kivitseqattaarneq eqqaasarpaat, allarpassuilli aamma sammineqartarput, Lasse isumaqarpoq.

– Crossfiternermi inuttut nammineq angorusutat anguniarneqartarput. Timitta ulluinnarni qanoq aalatittarnera eqqarsaatigalugu peqqinnartumik timiaalatinneqartarpoq, inuullu nammineq sapinngisai aallavigalugit anguniagassiisoqartarmat Crossfit tamainit timersuutigineqarsinnaavoq.

Crossfit sunaava?
Nukittussuseq, qasujaassuseq eqaarsaarnerlu ilisimatuussutsikkut tunngavilersorlugit, Crossfiterneq ingerlanneqartarpoq. Piffisami sivikitsumi timi assigiinngitsunik, pisariaqartitanik ingerlaannavissumik aalatinneqartarpoq. Nikerartuartumik timip aalatittuarneratigut, timip ineriartornissaa qulakkeerneqartarpoq. Eqaarsaarneq allanngorartittuaraanni eqaarsaariaaseq ataasiinnaq timip sungiussinnaasanngilaa. Ingerlaannavissumik eqaarsaaraanni uummatip tillernera sukkatsissimaartinneqartarpoq. Tamanna aatta timitsinni ingerlaarluarsinnaaneranik orsullu arrortinneqarsinnaaneranik annertusititsisarpoq.

Taamatut ulluinnarni timitta qanoq atortarnera aallaavigalugu iluaqutaasumik eqaarsaartarnikkut, ulluinnarni sulinitsinni timitta aalatittarnera sungiusarneqartarmat, ulluinnarni timikkut tarnikkullu iluarusunnerulernermik kinguneqartarpoq. 

Eqaarsaarnerup saniatigut aamma eqaarsaaqatigiit akornanni ataqatigiinneq peqqinnartunillu nerisaqarneq sammineqartarpoq. Tassa illit nammineq inuttut angorusutatit ineriartornerillu immikkut sammineqartarput.

Kalaallit Nunaanni inuit nukittunerulerlutillu peqqinnerulernissaat anguniagaavoq
– Charlotte Kamp aningaasaleeqataasullu allat pingasut peqatigalugit, kingullermik 2015imi Nuummi Crossfit box aallartipparput, Lasse oqaluttuarpoq.

CrossFit boxi nutaaq ateqarpoq CrossFit Inua, tamatumuunalu Crossfitertartut akornanni »anersaap« – tassa ataqqeqatigiinnerup sunneeqatigiinnerullu pingaartsinneri ersersinniarlugit, Inua atsiunneqarpoq. 

– Iluaqutigisassamik eqaarsaarnikkut ataqatigiinnikkullu peqqinnarnerusumik inooriaaseqalernissaq periarfissinniarneqarpoq, Lasse oqarpoq.

– Crossfiterluni eqaarsaarusuttarluta nuannaalertarlutalu allat aamma eqaarsaarnissaminnut pitsaanerpaamik periarfissinnissaat takorloorneqartarpoq.

lasse-nymand

CrossFit Inua
– Nalinginnaasumik Crossfiternermik iliniiartitsisarnitta saniatigut allarpassuarnik aamma neqerooruteqartarpugut. Aallartinnialerlaat, meeqqat, arpattartut, anaana Crossfit, 50it sinnerlugit ukiullit, Boot Camps allarpassuillu immikkut kattussorlugit aamma sungiusaasarpugut, Lasse oqaluttuarpoq.

– Arpaffissat, iputtaatit kiisalu assault bikes aamma pigaagut, ilaasortat piumasaminnik atorsinnaasaat.

– Nerisarisat, inuttut ineriartorneq, sungiusaasut ineriartornerat kiisalu unammisartunik sungiusaaneq pillugit aamma workshopernikkut isumasioqatigiittarpugut. Unammillerusunneq sammillugu timersortartunik unammisartunik nuimasunik tamakkununngalu siuttunik aamma oqalugiartitsisarpugut.

– Nittartakkatsinni akit takuneqarsinnaapput, aamma aaqqissuussatsinnut ilannguterusuttunut App pineqarsinnaavoq.

Sungiusaasoq Lasse
Lasse ukiorpassuarni inunnik ataasiakkaanik immikkoortumik sungiusaasarlunilu inuit anguniagaannik ikiuisarnikuuvoq. Ukiut ingerlaneranni aamma taassuma nammineq Arctic Circle Race, KangNu, Nuuk-Kapi Tour, New Yorkimi Marathon, marathonillu affaanik arpalluni unamminerit amerlaqisut peqataaffigisarnikuuai. 

Lasse 1999imi Projekt Matu-mut atatillugu sungiusaasartutut aallartippoq, taamanilu 6inik ukioqarpoq. Tamatumalu kingorna nammineq sungiusartuarnikuulluni. 2012imi CrossFit misilippaa, taamanikkorniillu sapaatip akunneranut agguaqatigiissillugu akunnerni qulini CrossFit ilinniutigisarnikuullugu.

– Timersornerup silarsuaani ujartornikuusara CrossFiternermi nassaarinikuuara, Lasse Nymand Petersen naggasiivoq.

Lasse pillugu paasissutissat

  • 2012: CrossFit Level 1 Trainer
  • 2012: CrossFit Endurance Trainer (running)
  • 2013: Pose Running Technician
  • 2014: CrossFit Weightlifting Trainer (level 1)
  • 2015: CrossFit Level 2 Trainer

Facebookimi annerusumik paasisaqarit
CrossFit Inua

Share on Facebook0Tweet about this on TwitterShare on Google+0Share on LinkedIn0Email this to someone