Sermersooq stressi pillugu politikkeqalerpoq

stress

Sulisut sinniisaannit kissaateqarneq naapertorlugu, Kommuneqarfik Sermersooq stressi pillugu politikkeqalerpoq. Sulisut tamarmik stressernermut ersiuteqarnermik pitsaanerusumik pinaveersaartitsinissaannut suussusersisaqarnissaannullu aammalu sammisaq pillugu anguniagaqartumik oqaloqatigiinnissamut ikiuutaassaaq

Aqutsisut, isumannaallisaanermik suleqatigiit sulisullu sinniisaat tamarmik stressip pinaveersaartinnissaanut suussusersinissaanullu akisussaaffeqarput. Maannakkullu taakkua Kommuneqarfik Sermersuumilu sulisut allat tamarmik tigussaasumik ikiortissarsipput. Politikki nutaaq stressi pillugu ilisimasaqalersitsivoq, oqallisigineqarnissaanullu ammaassilluni. Tamatuma saniatigut stressi pillugu politikki aqutsisup sulisullu stressi pillugu oqimaatsumik oqaloqatigiinnissaannut tigussaasunngortitsisinnaasumik sakkussaqartitsivoq.

Sulisoqarnermut Immikkoortortami pisortap Joan Ottesgaard Petersenip stressi pillugu politikki Pingaarnertut Suleqatigiinnissamut Ataatsimiititamit pisortaqatigiinnillu akuersissutigineqarsimasoq nuannaarutigaa.

”Neriuppunga stressip pilertortarnera pillugu aqutsisunut sulisunullu politikki annertunerusumik ilisimasaqarnerulersitsissasoq. Tassungalu peqatigitillugu stressernermut ersiuteqarnermik pinaveersaartitsinissaq qisuariaateqarnissarlugu ataatsimoorussamik akisussaaffigineqarnissaa anguniarneqarpoq.”

Stressi sunaava?
”Qujanartumik tamanna pillugu politikkimi annertunerujussuarmik paasisaqarsinnaavutit. Stressip suunerata nalornissutigiunnaarneqarnissaa anguniarparput. Suunera tupinnartuliaannilaq immikkulluunniit ittuunani, kisianni stressi suunersoq isumaqatigiissumik paasinissaa pingaaruteqarpoq.”

Stressi pillugu politikkeqarneq qanoq ikiuutaasinnaava?
”Neriuutigaarput, ajornartorsiutip aallaavia qanillattorfiginerulersinnaassagipput aallartippallaannginneranilu pitsaanerusumik suussusersisinnaanerulissagipput. Sulisunut stressilersimasunut psykologimukartitsisarnerit suliffimmit annertunerusumik stressimik pinaveersaartitsisussamik taarserniarneqartussaavoq, tassami stressi arlalinnik peqquteqarluni atulerneqarsinnaavoq – suliffeqarnikkut inuuniarnikkullu peqquteqarsinnaasoq. Kisianni politikki aammalu sammisaq pillugu oqaloqatiginninnissamullu najoqqutassiarlu taamatut pisoqarnermi tigussaasumik atorneqarsinnaassasoq neriuppugut.”

Share on Facebook0Tweet about this on TwitterShare on Google+0Share on LinkedIn0Email this to someone