Seouilimi aningaasaliinissamik siuarsaaneq pisussat ilaat

seoulfremstoed

Koreami Kujallermi inuussutissarsiorfimmit sinniisuutitat 200 sinnerlugit peqataaffiusumi pingasunngorneq 16. marts Seouilimi aningaasaliisarnermut isumasioqatigiinnerujussuarmi Vittus Qujaukitsoq qaaqqusisuuvoq. Isumasioqatigiinnerni marlunni takornariartitsineq, imarmiunit nerisassiat, puisit amii, aamma attaveqarfimmi, erngup nukinganik nukissiorfinni aamma aatsitassarsiornermik suliniutini aningaasaliinissamut periarfissat sammineqarput.
Isumasioqatigiinneq Kalaallit Nunaanni angalaarnernit takornariallu umiarsuarni angalanerini misigisassarpassuit pissanganartut pillugit oqallisissiamik aallartinneqarpoq. Visit Greenland, Air Greenland aamma Albatros Asia koreamiunut tusarnaartunut angalanissanut periarfissat, aamma sermip iigartartulimmut kangerlunni angalaarnernik, arsarnersiornerit aamma illoqarfinni nunaqarfinnilu kultureqassusermi misigisassanik annerpaanik saqqummiussipput.

Great Greenlandimit amernik atisaliat kingullerpaat, True North Gemsimit rubininik pinnersaasiat assissaqangnitsut peqatigalugit koreamiut atisanik takutitsisartuinit atisassarsiassanik saqqummiussinermi takutinneqarput. Takusaasut amernik atisaliat rubinillu assorsuaq soqutigaat.

Nunatsinni nerisassiornermik ileqqorisat pillugit aliikkutaalluartumik Edda Lyberthip imartamit tunisassianik isumasioqatigiinnermi sammisat saqqummiuppai, Maki Seaweedimiillu Ulrik Lyberthip tunisassiaatitik pissanganartut saqqummiullugit. Kalaallit Nunaanni imarmiunit nerisassianik tunisassiorsiortut Royal Greenland aamma Polar Seafood ullo’qeqqata siornani pisuni nunarsuarmi imarmiunit nerisassiat pitsaanerpaat avammut tunisartakkatik pillugit oqallisissiutertik naggasiutigaat.

Hotel Shillasimi igaffiup tallimanik ullorialikkap nunatsinnit imarmiunit nerisassiat, qeqqussat aammalu koreamiut iiuminartuliaannik tigooraasarfissat illinnarsakkat sassaalliutigai.

Ualikkut erngup nukinganik nukissiornermi, attaveqarfinni aamma aatsitassarsiornermik suliniutini aningaasaliisinnaanerit saqqummiunneqarput. Ullut siulliit ingerlanerini Vittus Qujaukitsoq Koreami tunisassiorfittut ingerlatseqatigiiffissuarnik, soorlu POSCO EC-mik aamma Daelim’imik ataatsimeeqateqartarsimavoq, taakkulu aningaaserivinnit aningaasaliisarfinnillu sinniisuutitat peqatigalugit amerlaqalutik suliniutit angisuut arlallit piareersarneqartut pillugit annertunermik tusagaqarusullutik ualikkut isumasioqatigiinnermut amerlaqalutik takkussuussimapput.

Daelim Industrial tassaavoq Koreami Kujallermi suliffeqarfiutilinni ingerlatseqatigiiffiit annerpaat ilaat, nunami tunisassiorfinnik arlalinnik ingerlatsisut annerpaat ilaannut Daelim Groupimut ilaalluni. Koreami, Iranimi, Pakistanimi Nepalimilu erngup nukissiorfiliornermik ingerlatseqatigiiffik arlalippassuartigut misilittagaqarpoq – suliniutit ilaat pinngortitami atugassarititat unammillernartut atugaralugit sanaartugaasimallutik. Daelim ilaatigut Pakistanimit misilittagaqarpoq, tassani naalagaaffik peqatigalugu suliniutini OPP-ni marlunni Pakistanimi naalagaaffimmut ukiuni 20-ni atuuttussamik isumaqatigiissuteqarluni Daelimi ingerlassaanik erngup nukissiorfiliorsimalluni.

Ilaatigut Daelimilu, nunatsinni erngup nukissiorfiliornissamut neriunartoqarfinnut annertuumik soqutiginninnerminik saqqummiussaqarsimasumut aallarniutitut oqaloqatigiinnissanik malitseqartitsinissamut isumasioqatigiinnerit periarfissiilluartuupput. Erngup nukissiornissamut isumalluuterujussuit atornissaannut periarfissanut ilorraap tungaanut suliniutigalugu sianiginnittoqalernissaq isumagissagipput assut pingaartuutippara, Vittus Qujaukitsoq oqarpoq, nangillunilu: Aammattaaq nunatsinnit aatsitassarsiornermik ingerlatseqatigiiffiit sisamat suliniutiminnik aningaasaliinissamut suleqatigisassatullu neriunartortalinnut saqqummiussiniarlutik Seouliliarsimasut assut soqutiginniffiunerat takullugu aamma iluarinaqaaq.

Isumasioqatigiinnerup saniatigut nunatsinni ingerlatseqatigiiffiit aamma koreamiut ingerlatseqatigiiffiisa aningaaseriviisalu akornanni ataasiakkaanik ataatsimiittoqartarpoq. Tamakku saniatigut isumasioqatigiinnerni attaveqarfissanik qilanaarutissanik nutaanik pilersitsisoqarpoq, Seouilimilu inuussutissarsiornermik pilerisaarinerup kingornatigut sapinngisamik piaarnerpaamik Kalaallit Nunaanni ilassutissanik ataatsimiinnernik tikeraarnermillu malitseqartitsisoqassaaq.

Share on Facebook0Tweet about this on TwitterShare on Google+0Share on LinkedIn0Email this to someone