Qallunaaq ilisimatusartoq

uni

Københavnimi ilinniartut amerlanerit nalugunarpaat, paarlaasseqatigiinneq aqqutigalugu Kalaallit Nunaannukarsinnaanertik. Nalunngitsuugunikku amerlanerit maanngartassagunaraluarput, ilinniarnerminut atatillugu qaammat ataaseq Nuummiittoq, Edith Lauglo Endsjø, taama isumaqarpoq.

Nuna ilisimaneqanngitsoq
– Maanngannginnanni Kalaallit Nunaat pillugu ilisimasakitsuaraavunga, Edith Lauglo Endsjø oqarpoq.

Edith 32nik ukiulik ulluinnarni Københavnip Universitetiani naalagaaffiit pillugit ilisimatusarpoq, qaammallu ataaseq Nuummi Ilisimatusarfimmi ilinniarluni.

Københavnimi ilinniaqataasa amerlanerit Edith Nunatsinnukarniarmat eqqumiigikujussimavaat.

– Danmarkimimi Kalaallit Nunaat pillugu ilisimasaqarpiannginnatta inuit eqqumiigaat, Edith oqarpoq.

Edith oqaluttuarpoq, nalagaaffiit pillugit ilisimatusaraluarlutik, Kalaallit Nunaat Naalagaaffeqatigiinnerlu ilinniagassaminnut ilaatinneqanngitsut. Tamanna ajorpallaartoq, Edith isumaqarpoq.

– Danmarkimi Kalaallit Nunaat, soorlu Namminersornermut Inatsisip qanoq atuutsinneqarnera Kalaallit Nunaannilu inuiaqatigiit pillugit ilinniagaqarnerusariaqaraluarpugut, Edith isumaqarpoq.

Immaqa takoqqikkumaarpugut
Sivisunerulaartumik Nuummiinnissani Edithip kissaatigingaluarpaa.

– Maaniinnera nuannareqaara. Pinngortitaq, imaq qaqqallu sumiluunniit assissaqanngitsumik eqqissisimanarput.

– Suut tamarmik Norgemi, Trondheimimi, meeraaffinnut assigusupilussuupput. Pinngortitaq maannga assigoqaaq.

– Maani najugaqarlunga atorfittaarnissara takorloorsinnaalluarpara. Ph.d. suliarilerukku maanngarnissara eqqarsaatigaara, Edith oqarpoq.

Sungiusarneq pinngortitarlu
Edithip maani sunngiffeqarnermini sungiusartarlunilu pisuttuaqattaartarpoq.

– Pisuttuaqattaangaatsiarpunga, soorunalumi misittariaqagaq Quassussuup kaajallannera aamma misilillugu. Tupinnaannartumik alianaappoq.

Pinngortitamiinnerup atuarnerullu saniatigut aamma allanut piffissaqartarpunga.

– Soournami aamma illoqarfiliarnikuuvunga. Tamanna aamma Trondheimimut assigoqaaq. Suut tamarmik mautgaangata aatsaat fisterneq aallartittarpoq.

– Inuppassuarnik naapitaqarpunga, tamarmillu tikilluaqqulluarnikooqaannga, Edith Lauglo Endsjø naggasiivoq.

Share on Facebook0Tweet about this on TwitterShare on Google+0Share on LinkedIn0Email this to someone