Nuummit Eqqaamasanut Katersugaasivik ilusinikkiartuaarpoq

lokalhistorisk

Ukiorpassuarni Peqatigiiffik Nuummit Eqqaamasat Nuummi Eqqaamasanut Katersugaasiveqalernissaq sulissutigaat.

Kommuneqarfik Sermersuumi kommunalbestyrelse 2009-mi ivertinneqarnerminiit illoqarfiit pingaarnersaanni illoqarfimmi eqqaamasanut katersugaasiviliornissaq kissaataasa annerpaat ilagisimavaat. Pilersaarutit kissaatillu maanna kiisami piviusunngortinneqarnialerpasipput.

Nuummi Eqqumiitsulianik Saqqummersitsiviup ukiup affaa kingulleq illoqarfimmi eqqaamasanut katersugaasiviliornissaq akissussaaffigaa. Suleqatigiissitami, ilaatigut Peqatigiiffik Nuummit Eqqaamasani ilaasortanit peqataaffigineqartumi, takorloorneqarsimasut naapertorlugit pilersitsiniartoqarpoq. Maanna Nuummi Eqqumiitsulianik Saqqummersitsivik piareersaatiminik ima angusaqarsimatigaaq allaat inernerit sapaatip-akunnera kingulleq Peqatigiiffik Nuummit Eqqaamasanut saqqummiussinnaasimallugu.

 Amutsivitoqqami katersugaasivik

Tamanna Nuutoqqami amutsivitoqqami pivoq. Qaammatini kingullerni annertuumik tassani nutarterisoqarpoq, init illoqarfimmi eqqaamasanut katersugaasivittut atorneqarnissaannut piareersarniarlugit. Katersugaasivissaq Nuutoqaq – Nuummi Katersugaasivik-mik taaguuteqassaaq, pilersinneranullu Nuup kulturikkut oqaluttuarisaanerata katersorneqarnissaa siunertaavoq. Tamatuma saniatigut katersugaasivik aamma oqaluttuarisaanermik ingerlateqqiisussaassaaq.

”Nuummi kulturikkut eriagisassat tigussaanngitsunik uummaarissumik ingerlatitseqqiisussamik, katersisussamik toqqorterisussamillu katersugaasivimmik pilersitserusuppugut. Katersugaasiviup katersai, immikkut ittumik saqqummersitsineri aaqqissuussinerilu tunngavigalugit katersugaasiviup Nuup kulturikkut oqaluttuarisaanera siammartissavaa soqutiginninnerulersitsiniassallunilu. Katersugaasivissaq illoqarfiit pingaarnersaata ullumikkut qangalu ineriartorneranik takutitsisuussaaq ilisimaneqarluartoq ataqqinartorlu,” oqarpoq Kommuneqarfik Sermersuumi borgmesteri Asii Chemnitz Narup, nangillunilu:

”Nuannaarutigaara kiisami tamaanga killissimagatta, aallarnisaasullu namminneq kajumissutsiminnik ingerlataqartut qutsavigerusuppakka. Nuummi soqutiginnittut tamarmik suleqatiginissaat qilanaarivarput. Ataatsimoorluta illoqarfimmi immikkuullarissunngortissavarput kusanartoq.”

 Nuummi allornerujussuaq

Peqatigiiffik Nuummi Eqqaamasaneersup Ole Christiansenip katersugaasivissamut aaqqissuussinissaq eqqarsaatersuutinillu tusarnaaqqaarluni amutsivitoqqami takornariarpoq. Peqatigiiffik Nuummit Eqqaamasat sinnerlugu nammineq init atorneqartussani periarfissaasut nalilersorpai.

”Init periarfissagissaarput pitsaallutillu. Peqatigiiffiup suliaqarnerani aaqqissuussanik ingerlatsinissaq periarfissaalissaaq, tassa maannamut periarfissaasimanngikkaluartunik ingerlatsisinnaalissagunarpoq. Inini periarfissat Nuummi oqaluttuarisaanermik soqutigisalinnut kajumissaataassapput suliaqalernissamut. Arlaannik aallartitsinissamut periarfissaassasoraara. Assersuutigalugu maani illoqarfimmi utoqqaat meeraanerminnik, inuusuttuunerminnik sulisimanerminnullu oqaluttuartarsinnaassapput”, Ole Christiansen oqarpoq, nangillunilu:

”Maannamut takusakka alloriarnerujussuupput. Katersugaasivik qassinilluunniit ukiulinnit atorneqarnissaa pingaaruteqarpoq. Immikkut soqutigisaminnik aallutaqartunut taamaallaat atorneqassanngilaq. Ornittakkatut atorneqaleriartornissaa kissaatiginarpoq. Kinaluunniit takkuttoq apeqqutaatillugu isumassarsiallu aallaavigalugit illoqarfimmi immikkoortoq ineriartortinneqarsinnaassaaq.”

Maannamut Nuutoqaq – Nuummi Katersugaasivik maajip naanerani ammarneqarsinnaassasoq Kommuneqarfik Sermersuup naatsorsuutigaa.

Share on Facebook0Tweet about this on TwitterShare on Google+0Share on LinkedIn0Email this to someone