Nutaamik aaqqiissutissanik suleqatigiinneq

tasiilaq

Kommuneqarfik Sermersooq aamma Namminersorlutik Oqartussat Tasiilami inuuniarnikkut ajornartorsiutit nutaamik aaqqiissutissarsiorfiginissaannut suleqatigiilerput

Kommuneqarfik Sermersooq Namminersorlutik Oqartussani Naalakkersuisoqarfiit pingasut suleqatigalugit Tasiilami inuuniarnikkut ajornartorsiutinut nutaamik aaqqiissutissarsiorpoq.

Naalakkersuisut siulittaasuat, Kim Kielsen, ukiortaami oqalugiarnermini oqaatigaa, 2016 tassaassasoq ”meeqqat ukiuat”, tamatumalu malitsigisaanik kissaatigalugu Tasiilami sumiginnarneqarsimasunut immikkut iliuuseqartoqassasoq.

Suliaq tamanna Kommuneqarfik Sermersuumit peqataaffigineqalerpoq.

”Namminersorlutik Oqartussallu siunnerfilimmik suleqatigiissinnaanerput nuannaarutigaarput. Ajornartorsiutit ima annertutigipput kikkut tamarmik ikioqatigiikkunik aatsaat qaangerneqarsinnaallutik”, Kommuneqarfik Sermersuumi Meeqqanut, Ilaqutariinnut Atuarfeqarnermullu Ingerlatsivimmi pisortaq, Søren Valbak oqarpoq.

Kommunip immikkoortoq ukiuni kingullerni misissuiffiginikuuaa, paasinarsisimallunilu ilaqutariinni meeqqat amerlasuut atugarliortuusut. Kommuneqarfik Sermersuup illoqarfimmi meeqqat najugaqartut affaat pillugit isumaginninnikkut suliassat annerusumik minnerusumilluunniit ilungersunaateqartut suliassaatigai.

Ajornartorsiutip annertussusaa pissutigalugu suleqatigiissitami ilaasortat isumaqatigiissutigaat, nutaamik eqqarsartoqartariaqalersoq.

”Ajornartorsiummik aaqqiiniarluni nalinginnaasumik iliuuseqartarneq malissagaanni meeqqat atugarliuuteqartut angerlarsimaffiup avataanut inissinneqassapput. Manna tikillugu taamaaliortarpugut angusalli pitsaavallaarsimanngillat. Taamaammat meeqqap avatangiisaata tamakkiisup sulissutigineqarnissaa pisariaqartuusoraara”, Søren Valbak oqarpoq.

Kommuneqarfik Sermersooq ilaqutariinnut katsorsaavimmik Nuummi pilersitseqqammerpoq, ilaqutariillu ilungersunartumik inissisimasut sutigut tamatigut sammivilimmik tassani ikiorneqassapput. Assersuutigalugu ilinniakkerinermik, atornerluisuunermut katsorsartinnermik, ilaqutariittut katsorsartinnermik ullaakkullu makissinnaanermik.

Neqeroorut taamatut ittoq Søren Valbakip takorlooraa, Tasiilami atorneqarsinnaassasoq. Ilanngullugu oqaatigaa, Tasiilami innuttaasut suleqatigalugit nutaanik aaqqissutissaliortoqassasoq.

Tasiilami inuuniarnikkut ajornartorsiutit ullumikkutut annertugilersimanerat isiginnaaginnarneqarsimavorlusooq, ilaatigut Ammassalik Kommuniusimasumi nukissaalatsineq pissutaalluni, ilaatigullu pisariaqartunik sulisussarsiniartarnerup Tunumi ajornakusoortuunera pissutaalluni.

”Tasiilami sulisoreriikkavut nuannaarutigiqaavut, illoqarfimmili nutaanik atorfinitsitsiniarneq ajornakusooqaaq. Uagutsinnut annertuunik unamminiaruminaatsitsipput”, oqarpoq Søren Valbak.

Kommuneqarfik Sermersooq Tasiilami tarnip pissusaanik immikkut ilisimasalinnik marlunnik pissarsioqqammeraluarpoq, ataatsimilluunniilli qinnuteqartoqanngilaq.

Share on Facebook0Tweet about this on TwitterShare on Google+0Share on LinkedIn0Email this to someone