Nunanit allaninngaanniit kajumissutsiminnik suleqataasut

frivilligeframangelande

Kalaallit hundredikkaat minnerunngitsumillu nuummiorpassuit kajumissutsiminnik suleqataaniarlutik nalunaarnikuupput suliaqarluartorujussuullutillu. Kajumissutsiminnik suleqataasorpassuit tunniusimalluinnartut akornanni aamma takussaapput nunanit allaninngaanniit kajumissutsiminnik suleqataasut, ilaatigut Bulgariamiit Danmarkiminngaanniillu.

»AWG2016-imiit kajumissutsiminnik suleqataasut tamaasa tulluusimaarutigisorujussuuagut aamma suliaqarluarneranullumi – uagut misigisimavarput kajumissutsiminnik suleqataasut tikeraartugut tigulluartorujussuugaat aammalu inuunerminni eqqaamasassaannik misigititseqataallutik« General Manager Maliina Abelsen oqarpoq.

»Nunatsinnut ikiuukkiartorlutik angalanissamut billetsisigaangata, maluginiarnartorujussuusarparput , tassami Issittumut tunngassuteqanngitsumiit aggerlutik ikiuukkiartormata.«

Ilagaallu Nikolina Gosheva Bulgariaminngaannersoq. Nikolina arlaleriarluni suliffini aqqutigalugu Nuummiinnikuuvoq. Angalanermi ilaani AWG2016-ini ilisimalersimavaa – taamaasilluni inuunermi ataasiaannarsinnaasumik misigisaqarfiusinnaasumik periarfissaqalerpoq, taamak oqarpoq itisilerlugulu.

»AWG-qarnernerani inuiaqatigiit pinngortitami sakkortoqisumi inuuniartartut naapeqatigiipput. Tamanna ullut tamaasa takuneqarneq ajorpoq. Olympiadertut takusarneqartuaannarsinnaapput, kisiannili AWG-inuunermi ataasiaannarluni periarfissaavoq.«

Nikolina nammineq Nuummut angalanini akilerpaa aammalu unammiuaarnermi akunnerpassuarni kajumissutsiminik suleqataalluni.

Qanoq pissarsiaqarfigineraa toqqaannartumik aperineqarami imak akivoq:

»Kalaallit Nunaat nuannareqaara aamma ullut ilaanni najulerusuppara! Eqqissisimanermik tunisarpaanga – inuit inussiarnersorujussuupput pinngortitarlu kusanarluni.«

Kajumissutsiminik suleqataanermini ilaanni NUIF-imi qitimmik workshopertitsisoqarnerani ikiuutaavoq, taamaasilluni meeqqat nukissaqarluarneri illarnerilu nassarlugit AWG2016 qimassavaa, taamak naggasiivoq.

AWG2016 1700-t missaanik kajumissutsiminnik suleqataasunik peqarpoq, amerlasoorpassuit suliffeqarfimminniit kajumissutsiminnik suleqataapput. Nunanit allaninngaanniit Nuummi kajumissutsiminnik suleqataasut inuit 90-t missaanniipput, soorlu Nikolina Gosheva, ilaatigullu Bulgariaminngaanniit, Danmarmikimiit, Canadamiit aammaa USA-miit aggersunik.

Share on Facebook0Tweet about this on TwitterShare on Google+0Share on LinkedIn0Email this to someone