Kujataani inuit uumasullu teriannianit kiineqarput

Qaqortoq

Terianniat qanillattussanngilasi, Kalaallit Nunaanni nakorsaaneq uumasullu nakorsaat innuttaasunut kajumissaaripput

Kujataani terianniat inunnut uumasunullu qanillattorniaannavipput.

Kalaallit Nunaanni nakorsaaneqarfik aamma Kalaallit Nunaanni Uumasut Nakorsaqarfia Inuussutissalerinermullu Oqartussaaffik innuttaasunit sapaatip akunnerini kingullerni marlunni ilisimatinneqartarput kujataani terianniat inunnik uumasunillu kiisisarsisartut.

– Terianniat qanillattorniartuarput – taamaattumik innuttaasut kingumut kaammattorusuppagut teriannianut qanillattoqqusarnagit. Terianniamik qimmimilluunniit perlerortumik kiitikkuit peqqinnissaqarfimmukassaatit, tassani kiitinnerit salitsissavat suliaritillugulu, Kalaallit Nunaanni nakorsaaneq, Henrik Trykker, erseqqissaavoq.

– Terianniat perlilertillutik perlerortillutillu illoqarfinnut qanillattortarput, nujuarunnaarsimasarlutillu, uumasut nakorsaat Sanne E. Wennerberg oqarpoq.

Terianniat perlerortut amerlanertigut qaasuttuusarput upanninniartuusarlutillu. Amerlanertigut paatsiveerussimaartuusarput nuffiortarlutillu.

Illoqarfinnut qanillattornaveersaarnissaannut periarfissatuarineqartoq tassaavoq nerineqarsinnaasunik eqqaanaveersaarnissaq, nerineqarsinnaasut uumasunut taakkununnga qanillattuutaasarmata. Qanillisut toqunneqartassapput.
Kommune Kujalliup terinniat qimmillu pitunneqanngitsut toquttassallugit aalajangersimavaa, taakkuninnga siumugaqartuartillugu toqutsisoqartassalluni. Terianniamik siumugaqaruit tamanna kommunimut politiinulluunniit nalunaarutigissavat.

Share on Facebook0Tweet about this on TwitterShare on Google+0Share on LinkedIn0Email this to someone