Kalaallit Nunaannut immani avatangiisini aarlerinaataasunik misissueqqissaarneq

havmiljoe

Sakkutooqarfiup Ataatsimoortumik illersuisussap (Den Værnsfælles Forsvarskommando) Illersornissamut ministereqarfik sinnerlugu Kalaallit Nunaanni eqqaanilu imartanut immani avatangiisini aarlerinaataasunik misissueqqissaarneq suliaraa.

Immani avatangiisini aarlerinaataasunik misissueqqissaarnermut siunertaavoq, Kalaallit Nunaanni umiarsuit angallannerannut tunngatillugu immani avatangiisini mingutsitsisinnaanerup aarlerinaateqarneranik ataatsimoortumik takussutissiinissaq. Misissueqqissaarneq Kalaallit Nunaanni siunissami immani avatangiisini upalungaarsimanerup katitigaanissaanut tunngaviusussani ilaatinneqassaaq.

Aarlerinaataasunik misissueqqissaarneq danskit illersornissamut isumaqatigiissutaanni nassuiarneqartoq, aqutsisooqatigiinnit ilaatigut Namminersorlutik Oqartussanit, Sakkutooqarfimmit Ataatsimoortumik illersuisussamit kiisalu Illersornissamut ministereqarfimmit inuttaqartinneqartumit aqunneqartumik suliarineqarpoq. Tamatuma saniatigut danskit aamma kalaallit oqartussaasui arlallit sulianut immikkut ilisimasaqarnernik, paasissutissanik nalunaarsukkanik aamma tusarniaanermut akissuteqaatinik taperseeqataapput, taamatullu misissueqqissaarnermut sapinngisamik pitsaanerpaamik tunngavissaqartitsinissaq qulakkeerniarlugu atuisut oqaaseqartartoqatigiit pilersinneqarput. Umiarsuit angallannerat, silap pissusaa aamma silamut tunngasut, uumasoqarnera, pinngortitap sunnertiassusaa allallu tunngaviusut pillugit paasissutissat annertuut taamaalillutik, assersuutigalugu ikkarlinnerup aamma uuliamik mingutsitsinerup pisinnaanerisa ilimanaateqarneranik sunniutaasussanillu – kiisalu immani avatangiisinut taakkua sunniutaannik nalilersuinermi, ilaatinneqarput.

Pilersuisuusoq, DNV GL (Det Norske Veritas Germanischer Lloyd), siusinnerusukkut assersuutigalugu Norge-mut Jan Mayen-imut aamma Svalbard-imut aarlerinaataasunik misissueqqissaarnermik suliaqarsimasoq, aarlerinaataasunik misissueqqissaarnermik assingusumik tunniussaqarsimavoq. Tamatuma saniatigut DNV GL Issittumi Siunnersuisooqatigiinnut immani avatangiisinut tunngatillugu misissueqqissaarnernik assigiinngitsunik tunniussaqarsimavoq.

Immani avatangiisini aarlerinaataasunik misissueqqissaarneq Pinngortitamut, Avatangiisinut Inatsisinillu Atuutsitsinermut Naalakkersuisoqarfiup nittartagaani takuneqarsinnaavoq. Misissueqqissaarnerpiaq tuluttut allaqqaarneqarluni pigineqarpoq, taamaattoq naalisaanerup kalaallisoortaa aamma danskisoortaa aamma Naalakkersuisoqarfiup nittartagaani nassaarineqarsinnaavoq.

Share on Facebook0Tweet about this on TwitterShare on Google+0Share on LinkedIn0Email this to someone