Kalaallit Nunaanni arnat akornanni timigissarnermut atatillugu maligassiuisoq

vivi-fleischer

Vivi Fleischer, maanna 26nik ukiulik 14inik ukioqarluni nukillaartutut innarluutilittullu nakorsanit nalilerneqarpoq, maannakkulli Kalaallit Nunaanni arnat timigissartartut akornanni maligaasiuisutut isigineqarluni.

Timigissarnermik soqutigissaqarluartoq inuusuttoq, Vivi Fleischer, aamma decembarimi DRimi P1imi ilanngutassiarineqassaaq. DRimeersut Nuummiinnikuupput, inuusuttut allat naalliullutik peqqillutik inuuniarsinnaanerinut pilerisaatissatut, P1-imi aallakaatitassamut Vivi apersoriartorlugu.

– Ikiorsinnaasakka tamaasa ikiorusuppakka. Facebookkikkut saaffiginnittorpassuit, soorlu timigissarnissaminnut tunngatillugu, tupinnaannarput. Ungasinngitsukkut facebookkikkut allakkama, sungiusarnermut nerisassatullu aaqqissuussanik nassinneqarusuttut mailitik allassinnaagaat, inuit 150it saaffiginnipput.

– Uanga nammineq nikallungasarnikooqaanga arlaleriarlungalu imminoriartarnikuullunga. Maanna kingumut qiviarlunga oqarsinnaavunga imminorneq aaqqiissutissaanngisaannartoq. Kiserliortutut misigingaluaraanniluunniit ilassaqartuaannartarpoq. Inuk ataasiinnarluunniit isumaginnerulersissinnaagukku iluaqutaasutut misigissaanga.

Nappaat
– Anniaateqarluni inuuneq sungiunniartuartariaqarnikuuara. Sisamanik ukioqarlunga aallartippoq. Eqqumiiginnakkut anniartalerpunga, soorlu ulussakka akuttunngitsumik annernarsinnaasarlutik. Angajoqqaamma Sanamut nakorsiuttaraluarlunga suna nappaatigineriga paarineqqarsinnaanngilaq. Uppiinnartarpunga, iluaallertarlunga attorneqalaaginnarlungalu qissasertarlunga.

– Pisinnaagaangama arsartarpunga. Ilaannili anniarpallaaraangama ilaasinnaasarnanga. Napaat sunaanersoq nakorsanut paaseqqusaraluaqaarput paasineqarsinnaananili. 14inik ukioqarlunga sapaatil akunneranut iisartakkat 170it iisalerpakka. Naggataatigullu iisartagartorpallaarsimallunga.

– Nakorsat paasisaqarsinnaanngimmata angajoqqaakka kamallutik pigisatik tamaasa tuniniariarlugit tusagassiuutinut oqaluttuassamaarput. Aqagukkulli timmisartoq ambulance tikippoq anaanaga ilagalugu Danmarkimi Rigshospitalemukaassisussaq. Napparsimmavimmi iterama sumiinnerlunga ilisimanngilara. Nakorsat piaartumik nappaatiga paasivaat, sunaaffa sisamanilli ukooqarlunga meeqqat peqittarfimmikkut gigternerannik nappaateqarsimasunga. Nappaat meeqqat peqittarfimmikkut gigternerat aammiilluni leukæmi/kræftimut assiguvoq. Nappaatip suulluunnniit saassuttarpaat, uanga alleqqukka, siffissakka miukkalu saassuppai. Niukka illuttut nukillaarput, nappaat sakkortungaarmat.

– Immikkut ilisimasallip iluamik nakorsaasersorneqarnissannut pilersaarusiorpaanga, timikkullu tamanna iluaqutigeqaara. Misiginikuusarpassuakkali pissutigalugit tarniluttaqaanga. Taamani 16inik ukioqarpunga inuusuttuuneralu allatulli atorluaannarusullugu. Niukka nikisilaarsinnaaleraluarlugit tunniutiinnaqqalerpunga. Aperiuartarpunga; »sooq uanga?«. Sooq naalliunnanga iluartumik nakorsaasersorneqaannarsimanngilanga? Imminut nalligeqalunga imminornissaq kisiat qimaariarfissatut isigaara.

Sungiusarneq
– Qangaanersoq imaluunniit sooq ullut ilaanni oqarfiginerlunga eqqaamanngilara, aalajangerpungali; »Massuma aserortissanngilaanga«. sungiusartalerlungalu. Aallaqqaammut nissukka siffissakkalu sungiusaruminaakkaluarput ilungersuinnarpungali. 17-18it miss. Ukioqarlunga Nuuk Fitnessimi aallartippunga, tassanilu piginnittup Carstenip assut ikiortarpaanga. Pilerisaartarpaanga qanoq iliornissannillu ilitsersortarlunga. Taassuma Dennis Rasmussen saaffigaa, taassumalu ilitsersulerlunga. Dennis inuuniutigalugu tilluuttartuunikuuvoq danmarkimilu Perfomance Gym pigalugu. Tamatuma kingorna internet aqqutigalugu ikiortarpaanga. 20nik ukioqalerama nakorsaatitortariaarullunga aamma isikkamik arsartalerpunga.

– Nakorsaatitortariaarunnissara naatsorsuutiginngisaannarnikuuara, nutaamilli inooriaaseqalernera iluaqutigisimaqaara. Innarluutilittut naqissuserneqarlunga siusinaatumik sulisinnaajunnaarnersiuteqalertussaariarlunga, maanna gymnasiami atuarnera naammassisinnaanngorpara. Gymnasia naammasseqqammerlugu ernertaarpunga akademimilu ilinniarnera kingorna naammassillugu. Tamatuma kingorna spaniamiut oqaasiinik ilinnialerpunga, allamik misileerusullunga. Maannakkut niuertarfimmi pisortaavunga, timigissartunut sungiusaasuullunga, isikkamik arsartarlunga erneralu, Liam, paarisarlugu. Taassuma isumassarsiortittaqaanga ilinniakkamalu naammassinissaanut piumassuseqalersillunga.

– Erninnut maligassiuisussaqarnissaa kissaatigaara. Uanga aamma allat isumassarsiortillugillu ikiorusuppakka. Kikkut tamarmik ilisimasariaqarpaat tamatta assigiinnginnatta – qanorluunniit inissisimangaluarutta. Qaqisinnaajuaannarputit.

Paasissutissat

  • Ateq: Vivi Fleischer
  • Atorfik: Butikschef, Yamatekimi
  • Inunngorfik: 15. marts 1989, Nuuk
  • Oqimaassuseq: 56,4 kg
  • Angissuseq: 156 cm
  • Timersuut suna aallutaraajuk? Timigissarneq isikkamillu arsarneq
  • Timersuutiga: Timigissarneq
  • Qanoq akulikitsigisumik sungiusartarpit? Sapaatip akunneranut arfinileriarlunga
  • Nerisannaat: Kalaalimerngit mamareqaakka aammali vietnamimiut forårsrulleliaat mamarilernikooqaakka.
  • Nammineq nerisassiortarpit? Aap, ullu tamaasa.
  • Immiaaqqat, imigassaq tuballu qanoq isigaagit? Arlaannaalluunniit atugarinngilakka. Pujortarnikuunngisaannarpunga. Ataasiarlunga imigassaq misilinnikuuara kisianni imertanngilanga.
  • Nipilersukkat suut nuannaraagit? Isumaga qanoq innersoq apeqqutaatillugu nuannarisaqartarpunga. Sungiusartillunga sakkortulaartut tusarnaartarpakka angerlarsimatillungali eqqissisimanerusut tusarnaartarlugit.
  • Atuakkanik aviisinilluunniit atuartarpit imaluunniit nutaarsiassat internetikkut pisarpigit? Nutaasiassat internetikkut atuartarpakka.
  • Katuamut fimeriakulaarpit– imaluunniit filmit TVkkut isiginnaartarpigit? Filmertarfiliarneq nuannaraara, periarfissaqaraangama. Aamma Netflix angerlarsimaffinni atortarlugu.
  • Inuttut inissisimaneq: Kisermaajullunga anaanaavunga, erneqarlunga, Liam, sisamanik ukiulik.
Share on Facebook0Tweet about this on TwitterShare on Google+0Share on LinkedIn0Email this to someone