Inatsisissatut siunnersuut nalilersorneqartoq

kammeradvokaten

Naalagaaffiup Inatsisilerituuata inatsisissatut siunnersuut nalilersorpaa

Naalakkersuisut isumaginnittoqarfiup aqunneqarnerata aaqqissuussaaneratalu pillugit nutaamik inatsisiliuuneqarnissaa pillugu siunnersuutaat ilaatigut Kommuneqarfik Sermersooq-ip borgmesterianit annertuumik isornartorsiorneqarsimasoq ukiup ingerlanerani saqqummiussimasaat ilalerneqarsimavoq. Isumaginninnermut Naalakkersuisoq Martha Lund Olsen-ip taamanikkut siunnersuutip Inatsisartunut saqqummiunneqarnissaa tunuartikkallarsimavaa.

Tamatuma kingorna Naalagaaffiup Inatsileritooqarfiata kikkunnulluunniit attuumassuteqanngitsunit nalilersorteriarlugu, inerniliussimavaa siunnersuut isornartorsiussallugu tunngavissaqartoqanngitsoq.

Tamanna toqqammavigalugu Naalakkersuisut siunniussimavaat inatsisissatut siunnersuut upernaakkut ataatsimiinnermut saqqummiuteqqinniarlugu. Siunnersuutip akuerineqassaguni periarfissiissutigissavaa Naalakkersuisut piffissami aalajangersimasumi kommunimi isumaginninnikkut oqartussaassuseqarfianik tigugallarsinnaasarnissaat, tamatumuuna nakkutilliisimanerup takutissimappagu kommuni assersuutigalugu meeqqanut inuusuttuaqqanullu tunngatillugu pisussaaffeqarfigisatik naammaginanngitsumik ingerlatsiffigisimagaat.

”Inatsit maannamut atuuttoq naapertorlugu periarfissaqanngilagut toqqaanartumik akulerunnissamut, assersuutigalugu meeqqanik sumiginnaasoqarsimatillugu kommuni pisussaaffigisani naapertorlugit qanoq iliuuseqarsimanngippat. Taamaattumik naalagaaffiup inatsisilerituuata akuersaartumik naliliisimanera iluarisimaarpara”, oqaaseqarpoq Martha Lund Olsen.

Isumaginnittoqarfiup aqunneqarnera aaqqissuussaaneralu pillugit inatsisissatut nutaap suliarineqarneranut toqqammaviuvoq 2014-mi 2015-milu illoqarfinni nunaqarfinnilu arlalinni nakkutilliiartortarnerni meeqqat sumiginnakkat pillugit pissutsinik ilungersunartunik toraagaqartoqartarsimanera.

Meeqqat illersuisuata Qaasuitsup Kommuniani angalareerluni meeqqat inuusuttuaqqallu atugarisaat pillugit isornartorsiuilluni nalunaarusiorsimanera aamma taamatut alloriartoqartariaqalersimaneranut pissutaaqqataavoq. Naalakkersuisut tamatumuuna anguniarsimavaat iliuuseqarsinnaanermikkut annertusaavigineqarnissartik.

Share on Facebook0Tweet about this on TwitterShare on Google+0Share on LinkedIn0Email this to someone