AWG2016-imik aaqqissuussaq annertoqisoq kajumissutsimik suleqataasussanik pisariaqartitsiffiuvoq

awg2maaneder

 AWG2016-imi timersornikkut kulturikkullu pisoqartitsinissamik pilersaarutit annertuut aallaavigalugit unammiuaarnissat tungaannut, ingerlanneqarneranni aamma ingerlanneqareernerini kajumissutsiminnik suleqataasussat suliffissaat maanna inissinneqarput.

Kalaallit Nunaanni aaqqissuussat annerssaannut atatillugu sapaatit akunneri arfineq pingasut qaangiuppata tikeraat 2.000-t sinnillit Nuummut tikissapput. Unammiuaarnerit ingerlanneqarnissaannut suut tamaasa piareersimatinniarlugit tikeraartitsisussat attuumassutillillu tamarmik ulappupput. Suliarineqartut ilagaat kajumissutsiminnik suleqataasussat qaqugu sumilu suliffissaannik pilersaarusiorluakkamik suliaqarnissaq.

Suliffissatut pilersaarut maanna suliarineqarsimalerpoq, taannalu takutitsivoq kajumissutsiminnik suleqataasut 1700-t missaanniittut suliffissatut pilersaarutigineqartorpassuit suliffigissagaat. Kajumissutsimik suleqataarusuttoqarluarlunilu suliniummut peqataarusuttoqarluarpoq, kisiannili inuit amerlanerusut suli atorfissaqartinneqarput.

– Qularutiginngilara AWG2016-imi unammiuaarnerit nutaanik ikinngutitaartornermik misigisanillu puigunaatsunik nassataqassasut. Asasara innuttaaqat, periarfissaq atorluaruk aaqqissuussarlu immikkuullarissoq akuuffigalugu. Atorfissaqartippatsigit, ilisimaarilluakkallu misigisassalluunniit nutaarluinnaat allanik avatangiiseqarlusi misilittarsigit, borgmesteri Asii Chemnitz Narupi, Host City-mi (tikeraartitsisuni) siulittaasoq kajumissaarivoq.

Kajumissutsimik suleqataarusulluni nalunaarfissaq kingulleq tassaavoq januaarip 31-at. Kingusinnerpaamik ulloq taanna nalunaarnissamut pissutaavoq piffissami februaarip 29-aniit marsip 16-iata tungaanut kajumissutsiminnik suleqataasussat pinerluuteqarsimannginnerannik aamma meeqqanik pinerliisimannginnerannik uppernarsaatinik pissarsiniarnissaq.

Share on Facebook0Tweet about this on TwitterShare on Google+0Share on LinkedIn0Email this to someone