Arctic Sounds 2016 ullumi aallartippoq

as16

Arctic Sounds 2016ip aallartinnissaanut sapaatip akunnerinnanngortoq, ullumi peqataasussat siulliit Sisimiunut tikeralereerput.

Musikfestivalip aallartinnissaa sapaatip akunneranik sioqqullugu, nipilersortartut Nunat Avannarlerni tamaneersut piginnaanerinik siuarsaasoqassaaq, erinarsuusiorneq sammineqassalluni kiisalu isumasioqatigiittoqassalluni.

Isumasioqatigiinnerit festivalernerullu nalaani, assit katersukkat ullut tamaasa nutarterneqartassapput, tusagassiuutinit soqutiginnittunit atorneqarsinnaassallutik.

Ukioq manna pingajussaanik festivali aaqqissorneqassaaq annertusiartupallallunilu. Festivali siullermik 2013imi aaqqissuunneqarmat nipilersortartut 40t miss. peqataapput. Ukioq manna 75it miss. peqataassapput.

Ukioq manna Sverigemiit, Norgemiit, Savalimmiuniit, Tysklandimiit, Danmarkimiit, Nunavummiit, Polenimiit, Letlandimiit soorunalumi Nunatsinniit Arctic Soundsimut peqataasoqassaaq.

Nunatsinniit peqataasussat tassaapput Nanook, Inuit Feet kiisalu Nina Kreutzmann-Jørgensen.

Amerlaqisunik aningaasaliisoqartanngippat Arctic Sounds aaqqissuunneqartarsinnaanngilaq. Taakkuupput nipilersortartut Nunat Avannarlerneersut naapeqatigiinnissaannik periarfissiisut.

Facebook, Instagram (ArcticSoundsFestival) kiisalu Snapchat (ArcticSounds16) aqqutigalugit, maannakkorpiaq pisut malinnaaffigineqarsinnaassapput.

Share on Facebook0Tweet about this on TwitterShare on Google+0Share on LinkedIn0Email this to someone