Aalisakkanik ilisimaneqanngitsunik misileraalluni ilisimaneqanngitsumi aalisarneq

forsoegsfiskeri

Naalakkersuisut aalajangerput aalisakkanik 2016-imi misileraalluni aalisarluni arlallit ingerlanneqassasut aamma sumiiffiit aalisarfigineqarsimanngisaannartut misissuiffigineqassasut.

– Naalakkersuisut imartarujussuatsinni misileraalluni aalisarnissat pingaartittorujussuuaat. Taamaattumik aalajangerpugut aalisakkanik misileraalluni aalisarnissat arlalissuit pissasut, aalisakkanik siumorneqarsimanngitsunik aamma sumiiffiit aalisarfigineqarsimanngisaannartut aalisarfigineqassallutik.

Neriuutigaarput misileraalluni aalisarnermi nutaanik aalisarfiulersussanik siumiusoqarumaartoq, siunissami aalisarfigineqalerumaartussanik, Aalisarnermut, Piniarnermut Nunalerinermullu Naalakkersuisoq Karl-Kristian Kruse oqarpoq.

Naalakkersuisuni ilaasortaq erseqqissaavoq misileraatitsinissaq sumiiffinnillu aalisarfigineqarsimanngitsuni aalisarnissaq Naalakkersuisooqatigiit suleqatigiinnissaminnut isumaqatigiissutaannut naapertuulluinnartoq, isumaqatigissuummi ima allassimasoqarluni:

Aalisakkat tunisassiarineqarsinnaasut nutaat atorluarneqassapput, aammalu aalisarfiusinnaasuni nutaani misileraatitsilluni aalisartitsisoqartassalluni, taakkunanilu pisat nunatsinni suliarineqartussanngorlugit tulaanneqartarnissaat aqqutissiuunneqassaaq.

Misileraalluni aalisarneq nassuiarneqarsinnaavoq uku siunertaralugit aalisarnertut

  • aalisagaqatigiinnik misissuineq, ilisimasaqarfigineqanngitsut
  • aalisarfinnik misileraaneq, ilisimasaqarfigineqanngitsut
  • Aalisariaatsit atortullu nutaat atorlugit aalisarnermik misileraaneq

Aajuku sumiiffinni aalisarfiusimanngitsuni misileraanissamut, misileraalluni aalisarnissamut aamma nutaanik atortoqarluni aalisarnermik misileraanissamut piumasaqaatit.

Sumiiffinni aalisarfiusimanngitsuni misileraaneq

Aalisakkat: Tunumi qaleralik, saarullik, suluppaagaq, nataarnaq aamma brosme

Piumasaqaatit: Ningittakkat, qassutit, pullatit qassutillu nunamut pituttakkat atorneqarsinnaapput. Sineriammit avammut 3 sømilip killeqarfianit 3 sømilit angullugit aalisartoqarsinnaavoq. Aalisariutit aalisarsinnaanerminnut akuersissutillit aalisaatigalutik aalisariutinit mikinernit tunitsivittut atorneqartassapput. Ingerlatseqatigiiffiit qinnuteqartut aalisarnermut pilersaarutsik Naalakkersuisoqarfimmut nassiutissavaat.  Ingerlatsiveqartigiit aalisarnermut pilersaarumminni nassuiaatigissavaat imartaq qanoq annertugisoq – siammasitsigisoq misileraalluni aalisarfiginiarlugu.

Aalisakkat: Tunumi saattuat, snekrabber

Piumasaqaatit: Pisassiissutit 500 tonsiupput. Tunumi saattuarniarneq avataani sinerissallu qanittuani pisinnaavoq. Amerlanerpaamik aalisariutit marluk akuersissutinik pisinnaapput. Pullatit atorneqarsinnaapput.

Aalisakkat: Kitaani avaleraasartuut

Sinerissap qanittuani aalisarneq

Piumasaqaatit:

Kitaani sinerissap qanittuani avaleraasartuunik killeqanngitsunik aalisagartassiisoqarpoq. Kitaani sinerissap qanittuani aalisarnissamut akuersissutillit tamarmik misileraalluni avaleraasartoorniarnissamut akuersissummik pisinnaapput. Sinerissap qanittuani aalisarnermit Pinngortitaleriffimmut misissugassanik nassiussisoqartassanngilaq.

Avataani aalisarneq

Piumasaqaatit: Kitaani killeqanngitsumik aalisarnissamut akuersisoqarsinnaavoq.

Aalisarneq: Kitaani ammassassuit, ammassat saarullernat

Piumasaqaatit: Qalorsuit ungersortakkat qalorsuillu aalisarnermi atortorineqarsinnaapput.

Aalisarneq: Tunumi 67N-ip avannaani raajarniarneq.

Piumasaqaatit: Tunumi 67N-ip avannaani raajat 500 tonsit pisassiissutaapput.

Aalisakkanik ilisimasaqarusulluni aalisarneq

Aalisarneq: Tununi Kitaanilu guldlaksinik aalisarneq

Piumasaqaatit: Pisassiissutit 3.500 tonsiupput. Pisassiissutaasut killeqanngitsumik aalisartoqarsinnaapput. Aalisariutit guldlaksinik misileraalluni aalisarniartut suluppaagarniarnissamut saarullinniarnissamullu akuersissuteqareersut aalisarsinnaapput. Saniatigut pisanut piumasaqaatit nalinginnaasut naapertorneqassapput.

Aalisarneq: Tunumi Kitaanilu putooruttunik aalisarneq

Piumasaqaatit: Pisassiissutit 3.000 tonsiupput. Saniatigut pisanut piumasaqaatit nalinginnaasut naapertorneqassapput.

Aalisarneq: Eqqusat

Piumasaqaatit: Eqqusanik aalisarniarlutik pilersaaruteqartut pisariaqartitsineq naapertorlugu akuersissummik tunineqarsinnaapput. Immap natia oqimaatsunik kiliuteqarluni eqqusarniarfigineqassappat,  pinngortitap ataqatigiinnerata ajortissutaasinnaaneranut immikkut piumasaqaatit atuutsinneqassapput. Koralit, svampit assigisaallu pillugit Kalaallit Nunaanni Aalisarsinnaanermut Akuersissutinik Nakkutilliisoqarfimmut nalunaarutigineqartassapput.

Aalisarneq: Tunumi toldkrabbit

Piumasaqaatit: Taakku aalisariutinik amerlanerpaamik marlunnik aalisarneqarsinnaapput. Pullatit atorlugit aalisarsinnaanermut akuersisoqassaaq.

Aalisariaatsit atortullu nutaat atorlugit aalisarnermik misileraaneq

Aalisarneq: Kitaani eqalukkanik eqalugaasanillu aalisarneq

Piumasaqaatit: Eqalukkat 5.000 tonsit eqalugaasallu aamma 5.000 tonsit pisassiissutaapput. Qalunik, qalunik ungersortakkanik aamma pullatinik aalisarneqarsinnaapput.

Qinnuteqarfissaq kingulleq tassaavoq marsip 10-at. Misileraalluni aalisarnissamut immersugassaq allattuiffigalugu qinnuteqartoqassaaq.

Misileraalluni aaliarnissamut akuersissummik qinnuteqarnikkut pisoqarsinnaavoq. Misileraalluni aalisarnissamut akuersissutit kalaallit ingerlatseqatigiiffiannuinnaq tunniunneqarsinnaapput.

Share on Facebook0Tweet about this on TwitterShare on Google+0Share on LinkedIn0Email this to someone